Математика сабағында өмірмен байланысты тапсырмаларды қолдану арқылы математикалық сауаттылықты дамыту
Қазіргі білім беру жүйесінде оқушылардың тек теориялық білім алып қана қоймай, сол білімді күнделікті өмірде қолдана білуі маңызды болып отыр. Осы тұрғыдан алғанда математикалық сауаттылықты дамыту – мектептегі математика пәнін оқытудың негізгі мақсаттарының бірі.
Математикалық сауаттылық дегеніміз – адамның математикалық білімін түрлі өмірлік жағдайларда пайдаланып, дұрыс шешім қабылдай алу қабілеті. Математика сабағында өмірмен байланысты тапсырмаларды қолдану оқушылардың пәнге деген қызығушылығын арттырып қана қоймай, олардың логикалық ойлауын, талдау жасау дағдыларын дамытады. Егер оқушы есептің өмірде кездесетін нақты жағдайлармен байланысты екенін түсінсе, ол математиканы тереңірек меңгере бастайды. Сондықтан сабақ барысында күнделікті өмірде кездесетін мысалдарды қолдану өте тиімді. Мысалы, дүкендегі заттардың бағасын есептеу, пайыз арқылы жеңілдікті анықтау, жол жүру уақыты мен жылдамдықты есептеу сияқты тапсырмалар оқушылардың математикалық білімін өмірде қолдануына мүмкіндік береді. Мұндай есептер арқылы оқушылар тек формуланы жаттап қана қоймай, оны нақты жағдайларда қолдануды үйренеді. Сонымен қатар статистикалық мәліметтермен жұмыс жасау, диаграммалар мен кестелер құру да математикалық сауаттылықты дамытуға ықпал етеді.
Өмірмен байланысты тапсырмалар оқушылардың шығармашылық және зерттеушілік қабілеттерін де дамытады. Оқушылар мәселені өз бетімен талдап, түрлі шешу жолдарын қарастырады. Бұл олардың сыни ойлау дағдыларын қалыптастырып, білімге деген қызығушылығын арттырады. Сонымен бірге топтық немесе жұптық жұмыстар арқылы оқушылар бір-бірімен пікір алмасып, өз ойын дәлелдеуге үйренеді.
Қорыта айтқанда, математика сабағында өмірмен байланысты тапсырмаларды қолдану – оқушылардың математикалық сауаттылығын дамытудың тиімді жолдарының бірі. Мұндай тапсырмалар оқушылардың білімін практикамен ұштастырып, математиканың өмірдегі маңызын түсінуге көмектеседі. Нәтижесінде оқушылар алған білімін түрлі жағдайларда қолдана алатын, ойлау қабілеті жоғары, білімді тұлға болып қалыптасады.
Куанышова Акжан Сабыркызы.
Амангелді атындағы орта мектебінің математика пәнінің мұғалімі
Жамбыл облысы Байзақ ауданы Көкбастау ауылы.
